Құжатсыз көлік басқарсаңыз қамауға алынасыз

Полицейлер жеке куәліксіз немесе жүргізуші құжатынсыз жолға шыққан жүргізушілерді қамауға ала алады. Көлік айып тұрағына қойылуы мүмкін. Бұл туралы Bugin.kz платформасы  Kolesa.kz-ке сілтеме жасап хабарлайды.

"Әкімшілік құқықбұзушылық туралы кодекстің 612-бабы 1-бөлігіне сәйкес, көлікті құжатсыз басқарған жүргізушілер үшін әкімшілік жауапкершілік қарастырылған. Егер жағдай бірінші рет тіркелсе, ескерту жасалады немесе 5 АЕК көлеміндегі (14 585 теңге) айыппұл салынады. Жүргізуші құжат мәліметін айтудан бас тартса немесе жалған ақпарат берсе, ІІБ қызметкерлері жүргізушіні қамауға ала алады. Мұндай жағдайда көлік айып тұрағына қойылады", - делінген жауапта.

Министрлік полицейлер құжатсыз жүргізушінің тұлғасы қандай жағдайда және қалай анықталатынын нақтыламады. Әкімшілік құқықбұзушылық туралы кодекстің 785-бабында аты-жөнін анықтау үшін тәртіп бұзушыны ұстауға болатыны жазылған. Ал 789-бапқа сәйкес, оны 3 сағаттан артық қамауда ұстауға болмайды.

Сонымен қатар, кодекстің 797-бабы бойынша полицейлер рөлге құжатсыз отырған жүргізушінің көлігін айып тұрағына жіберуге құқылы.