Суицид жасайтын сарбаздардың өліміне кім жауапты?

Қазақстан Қарулы күштеріндегі әрбір әскери қызметшінің өліміне Қорғаныс министрлігі жауапты. Бұл туралы ведомствоның тәрбие және идеологиялық жұмыс департаментінің бастығы Серік Борамбаев мәлімдеді, деп хабарлайды Bugin.kz порталы Ulysmedia.kz сайтына сілтеме жасап.

Орталық коммуникациялар қызметіндегі баспасөз мәслихатында министрлік өкіліндеріне жыл басынан бері 4 әскери қызметші өз-өзіне қол салғанын еске салды. Мұны көпшілік «дедовщинамен» байланыстыратынын атап өткен тілшілер сарбаздар өлімі үшін кім жауапты екенін сұрады.

«Өкінішке қарай Қарулы күштерде мұндай фактілер болды. Бірақ Қарулы күштердің де қоғамның бір бөлігі екенін атап өткен жөн. Қоғамда болып жатқан барлық процестер бізде де жүреді. Сіз қазір айтқан мәселе де бар. Бірақ біз Қарулы күштер құрылымы екенімізді, тек Қорғаныс министрлігіне бағынатын әскери бөлімдерге жауап бере алатынымызды білген дұрыс. Бізден бөлек, Ішкі істер министрлігіне, Ұлттық қауіпсіздік комитетіне, Төтенше жағдайлар министрлігіне және Мемлекеттік күзет қызметіне бағынатын әскери бөлімдер де бар», - деп түсіндірді Қорғаныс министрінің орынбасары Сұлтан Қамалетдинов.

Министрліктің тәрбие және идеологиялық жұмыс департаменті бастығының міндетін атқарушы Серік Борамбаев ведомство әскери қызметшілердің қаза болуына жауапты екенін айтты.

«Біз жауаптымыз. Әрбір жағдай -  марқұмның туыстары мен жақындары үшін ғана емес, барлық Қарулы Күштер үшін де орны толмайтын қайғы. Бұл ретте жауапкершілік төменгі деңгейден Қорғаныс министрлігінің басшылығына дейін бәріне артылады. Сондықтан әр оқиға жеке және ерекше тәртіпте қарастырылатынын түсіну керек. Қарулы Күштер мен басқа әскерлер, құрылымдар бар. Мерзімді қызмет сарбаздары, келісімшарт бойынша әскери қызметшілер, офицерлер бар. Офицерлермен және келісімшарт бойынша әскери қызметшілермен байланысты өлімнің түрі де әртүрлі: ауырып қайтыс болғандар, жол апатына ұшырағандар бар. Өйткені олар қоғамның барлық азаматы сияқты қызметке келіп, кешке үйіне кетеді. Содан кейін олар қарапайым азамат сияқты күнделікті мәселелермен айналысады», - деді Серік Борамбаев.