18 адам есірткі қылмысы үшін өлім жазасына кесілді

Въетнамда есірткі контрабандасымен және сатумен айналысқан 18 адамның ішінде Оңтүстік Кореяның екі азаматына өлім жазасы тағайындалды, деп хабарлайды Bugin.kz порталы Kazinform сайтына сілтеме жасап.

Оңтүстік Корея полициясының бұрынғы офицері 63 жастағы Ким Сун Сик пен оның отандасы 30 жастағы Кан Сон Хок Въетнамның Хошимин қаласында төрт күнге созылған сот шешімімен өлім жазасына кесілді.

Сот процесінен кейін 58 жастағы Қытай азаматы Ли Тянь Гуан мен олардың 36 жастағы въетнамдық басшысы Ле Хо Ву және басқа да 14 адамға өлім жазасы тағайындалды.

Топ 2020 жылдың мамыр айынан маусымға дейін "216 келіден астам есірткіні заңсыз сақтап, сатқан және алмасып отырған". 168 келіден астам "есірткі түрі тәркіленді" деп хабарлады Cong an Nhan dan. Басылым оның қандай түрлері табылғанын нақтыламады.

Есірткі Камбоджадан Хошиминге жеткізілген, оның бір бөлігі ел ішінде пайдаланылса, екінші бөлігі Оңтүстік Кореяға жөнелтіліпті.

Ресми мәлімдеме бойынша, Оңтүстік Кореяға өту үшін шекаралық тіркеуден өтіп жатқан көлікті 19 шілде күні Хошиминде қызметкерлер тексерген. Ішінен "жалпы көлемі 39,5 келі болатын, ақ кристалдар салынған 40 пластик қап" табылды.

БАҚ ақпаратынша Ву "заңсыз есірткі тасымалдағаны" және "жалған мөр мен құжаттар пайдаланғаны" үшін айыпты деп танылды.

Қалған 17 адам "есірткіні заңсыз сақтағаны", "есірткіні заңсыз сатқаны" және "есірткіні заңсыз пайдалануды ұйымдастырғаны" үшін сотталды, деп хабарлады мемлекеттік БАҚ.

Үш адам "есірткі саудасы" үшін өмір бойына бас бостандығынан айырылса, кәмелет жасына толмаған бір бала 15 жылын қамауда өткізетін болды.

Въетнам соты есірткіге қатысты қылмыс жасаған адамдарды жиі өлім жазасына кеседі.

Amnesty International дерегінше, ел әлемде өлім жазасы бойынша көш бастап тұр.