Қостанайда жоғалған 10 жасар баланың жағдайы белгілі болды

Қостанайда полицейлер жоғалған 10 жасар баланы үйіне аман-есен қайтарды. Бұл туралы Bugin.kz  тілшісі Polisia.kz сайтына сілтеме жасап хабарлайды.

24 сәуірде кешке бір әйел полицияға қоңырау шалып, ұлының жоғалғаны туралы хабарлады. Ол оған мектептен, Юбилейный шағынауданынан Әуежай шағынауданындағы үйге дейін таксиге тапсырыс береді. Қолданбада жолдың жартысында маршруттың аяқталғаны туралы хабарды көргенде, әйел үрейге бой алдырды. Баланың телефоны жоқ, ол бірден такси жүргізушісіне қоңырау шала бастады. Жүргізуші клиентті күтпей-ақ тапсырысты жойып, басқа мекен-жайға кеткенін түсіндірген.

Кәмелетке толмағанды іздеуге дереу 50-ге жуық полиция қызметкері кірісті. Олардың қатарында патрульдік, ювеналды полиция және учаскелік инспекторлар бар. Сондай-ақ өңірлік еріктілер де баланы іздестіруге көмектесті. Бала жарты сағат ішінде табылды.

Оны патрульдік полиция қызметкерлері Жақсылық Сатмағамбетов пен Дүйсенбай Қоянбаев тапты. Олар Әуежай шағынауданында патрульдеп жүріп, жоғалған бала туралы бағдар алып, 2-ші Қостанайға қарай бет алған.

Баланы тапқан қызметкер Жақсылық Сатмағамбетов:

" Біз оны жаңа айналма жолдың бойында байқадық. Ол үйіне қарай бет алған. Бұл жоғалған бала екенін бірден түсіндік. Оны бірден көлікке отырғызып, үйіне алып кеттік", – деді.

Белгілі болғандай, бала көлікті күтпей, үйіне жаяу шыққан. Оқушының анасы ұлын іздеуде көрсеткен көмегі үшін полицейлерге алғысын білдірді. Ведомствода ата-аналарды балаларды бақылауда ұстап, оларды мектептен өздері алып кетуге шақырады.