Қырғызстан мен Тәжікстан шекарасында оқ атылды

Қырғыз-тәжік шекарасында атыс болды, деп хабарлайды Bugin.kz порталы.

7 мамыр күні болған шекарадағы атыс туралы Қырғызстан Республикасының Ұлттық қауіпсіздік мемлекеттік комитеті мәлімдеді.

Сағат 12:20 шамасында Баткен облысы Лейлек ауданындағы Ақ-Босого ауылы маңында Қырғызстан шекарашылары мал жайып жүрген тәжік шопандары көзге түскен.

Қырғызстанның ұлттық комитеті Тәжікстан азаматтарының әскери қызметкерлерге тас лақтыра бастағанын мәлімдеді. Артынша шопандардың бірі қырғызстандық шекарашыларға екі-үш оқ атқаны анықталды.

“Қақтығыстың одан әрі өршуіне жол бермеу үшін қырғыз шекарашылары әуеге ескерту оқтарын жаудырды, содан кейін шабуылдаушылар Тәжікстанға қарай шегінді. Қырғызстан шекарашылары арасында зардап шеккендер жоқ", - деп түсіндірді Қырғызстан Республикасы департаментінің баспасөз қызметі.

Алдын ала мәлімет бойынша, тәжікстандық шопан жараланған. Толық мәлімет әлі жарияланбады.