Қостанайдағы даулы видео: Lexus жүргізушісі оқудан шығарылып, жұмысынан айырылды

Қостанай – Әулиекөл – Сұрған тасжолында түсірілген даулы видеодан кейін Lexus жүргізушісі Қостанай ІІМ академиясынан шығарылып, жұмысынан босатылды, деп хабарлайды Bugin.kzпорталы. 

Академияның мәліметінше, қызметтік тексеріс барысында жүргізушінің жол ережесін бұзып, құқық қорғау органдарының беделіне нұқсан келтіргені анықталған. Осыған байланысты ол магистратурадан шығарылып, ІІО қатарынан да шеттетілген.

Айта кетейік, кеше ғана аталған оқиғаға байланысты қызметтік тексеріс басталғаны туралы ақпарат тараған еді. Оның қорытындысы бойынша, Lexus жүргізушісіне айыппұл салмаған екі инспектор тәртіптік комиссияның шешімімен қызметтен босатылған.

Ал Lexus жүргізушісі Қостанай ІІМ академиясының магистранты болғандықтан, тергеу нәтижесіне қарай оны оқудан шығару туралы шешім қабылдануы мүмкін екені айтылған болатын.

Еске сала кетсек, бұған дейін әлеуметтік желілерде патрульдік полиция қызметкерлерінің Lexus жүргізушісін тоқтатқан видеосы тараған еді. Бейнежазбада жүргізушінің инспекторға наразылық білдіріп, дөрекі сөйлегені анық көрінеді. Ол полицейге “нөмірімді жаттап ал” деп бұйырып, қызмет өтілін сұраған. Кейін өзінің бұрынғы жол полициясы қызметкері екенін айтып, 11 жыл бойы ГАИ-де істегенін және жол ережелерін жетік білетінін мәлімдеген.

Қысқа тартыстан кейін жүргізуші көлігіне отырып, оқиға орнынан кетіп қалған. Белгілі болғандай, полиция оған ешқандай айыппұл салмаған.