Спорт

Данияр Елеусіновтің жеңісі: Нокаут! (Видео)

Алға, қазақ жігіттері

Авторларды қолдау орталығы

mediabugin@gmail.com

Монакодағы бокс кешінде Олимпиада чемпионы Данияр Елеусінов никарагуалық Маркос Мохикамен шаршы алаңға шығып, жеңіске жетті, деп хабарлайды ҚазАқпаратқа Bugin.kz сілтеме жасап. 

Батыс Қазақстан облысынан түлеп ұшып, әуесқой бокстағы барлық биікті бағындырған 1991 жылғы Данияр Елеусіновтің (4-0, 2 КО) бұл кәсіпқой рингтегі бесінші кездесуі болса, 33 жасар Маркос Мохика (16-2-2, 12 КО) одан әлдеқайда тәжірибелі екені анық-ты.

Кәсіпқой рингте жүргеніне сегіз жыл болған Маркос бұған дейін тек өз елінде өткізген 20 жекпе-жектің 16-сында жеңіске жетсе, соның 12-сін нокаутпен аяқтаған. Ал, кәсіпқой бокстағы қадамын биыл ғана бастаған Данияр төрт айқасының екеуінде қарсыласын нокаутпен жеңген. 

«Казино де Монте-Карлодағы» сегіз раундтық шайқаста Данияр жекпе-жек тізгінін бірден қолына алып, ауыр соққылар дарыта бастады. Екінші раундта-ақ қазақстандық боксшы қарсыласын нокдаунға жіберді. Мохика екінші рет нокдаунға түскен сәтте гонг та соғылды.

Үшінші раундта Данияр никарагуалықты тағы бір нокдаунға жіберді. Ақыры Мохика екі ауыр соққы алғаннан кейін төреші жекпе-жекті тоқтатты. Нокаут!

Д.Елеусінов кездесуден кейін сұхбат беріп, қазақстандық жанкүйерлерін алдағы уақытта үлкен жеңістерімен қуантатынын жеткізді.

Еске сала кетейік, бұл кештің басты жекпе-жегінде бірінші ауыр салмақтағы бұрынғы әлем чемпионы, ресейлік Денис Лебедев (31-2, 23 КО) америкалық Майк Уилсонмен (19-0, 8 КО) жұдырықтасады.