Шымкентте «Бір ел – бір кітап – 2019» акциясы өтті

Шымкентте 2019 жылғы 28 қараша күні «Отырар» қалалық ғылыми-әмбебап кітапханасында «Бір ел – бір кітап – 2019» акциясы өтті.  Бұл шарада таңдалған қазақ поэзиясының көрнекті өкілі, ақын Әбділда Тәжібаевтың шығармалары және заңғар жазушы Әбіш Кекілбаевтың «Аңыздың ақыры» кітабын насихаттау және оқырмандар арасында қорытындылау мақсатында әдеби кеш болды.

Қазақтың дүлдүл ақыны Әбділда Тәжібаевтың «Біз де қазақпыз» атты поэтикалық драмасының тарихи астарын талдаған тарих ғылымдарының магистрі А.Оралова, Тәжібаев шығармаларының тарихтың ақтаңдақ тұстарын ашудағы деректік маңызына тоқталды. 

Кеште қазақтың қара домбырасы шертіліп, қазақ әдебиеті классиктерінің туындылары орындалды. Шара соңында «Аңыздың ақыры» кітабы кітапханашылар арасында талқыға салынып, оқырмандардың өзіндік көзқарастары мен пікірлері тыңдалды.