Байден Украинаға әскери көмек жіберуге келісті

АҚШ президенті Джо Байден Украина басшысы Владимир Зеленскиймен телефон арқылы сөйлескенін, нәтижесінде Киевке әскери көмектің жаңа пакетін жариялағанын айтты. Бұл туралы Bugin.kz порталы Ақ үйдің сайтына сілтеме жасап хабарлайды.

Америка Құрама Штаттары басшысының айтуынша, Вашингтон «Украинаға қару-жарақ, оқ-дәрі және басқа да қауіпсіздік шаралары түрінде» қосымша 800 миллион доллар бөледі.

Байден америкалық тарап Киевке жаңа пакеттің бір бөлігі ретінде бұрын жеткізілген қару-жарақ пен әскери техниканың екі түрін, сондай-ақ «жаңа құралдарды», оның ішінде бронетранспортерлер, артиллериялық жүйелер мен снарядтарды жіберуге ниетті екенін атап өтті.

- «Мен қосымша тікұшақтарды беруге де келістім», - деді Байден.

Ол АҚШ-тың қару-жарақ жеткізуден бөлек, Украинаға маңызды әскери көмек көрсету үшін одақтастарымен келіссөздер жүргізіп жатқанын айтты.