Ресей Солтүстік Кореядан миллиондаған қару-жарақ түрлерін сатып ала бастады

Ресей санкциялар мен Украинада соғыс жүргізуге экономиканы жұмылдыра алмау салдарынан Солтүстік Кореядан миллиондаған артиллериялық снарядтар мен зымырандарды сатып ала бастады. Бұл туралы АҚШ барлау қызметі мәлімдеді, деп хабарлайды Bugin.kz порталы New York Times  басылымына сілтеме жасап.  

Жеткізулер туралы егжей-тегжейлі ақпарат айтылмады, бірақ жақын қашықтықтағы зымырандар мен артиллериялық снарядтардан басқа Ресей Солтүстік Кореяның әскери техникасына қызығушылық танытып отырғаны белгілі.  

NYT сұхбаттастарының айтуынша, Мәскеудің Пхеньянмен келісімі Ресей басшылығының шарасыздығын көрсетеді, өйткені Ресей ең қарапайым әскери техниканы қажетті мөлшерде шығара алмай отыр.  

Солтүстік Кореяда жоғары технологиялар жоқ, деп еске алады американдық кәсіпкерлік институтының (AEI) әскери сарапшысы Фредерик Каган. Оның айтуынша, Пхеньян 152 миллиметрлік артиллериялық снарядтарды немесе Катюша зымырандарын жеткізе алады.  

«Кремльдің Солтүстік Кореядан немесе басқа біреуден артиллериялық снарядтар мен зымырандарды сатып алуға мәжбүр болуының жалғыз себебі - Путин Ресей экономикасын тіпті ең қарапайым деңгейде соғысқа жұмылдыруды қаламауы», - деді Каган.  

Соғысты зерттеу институтының (ISW) Ресей тобының жетекшісі Мейсон Кларк та дәл осындай пікірде.  

«Кремль Солтүстік Кореядан кез келген нәрсені сатып алуы мүмкін», - деді ол.  

Батыстың санкциялары Ресейге жоғары технологиялық компоненттерді экспорттауға тыйым салып, жеткізу тізбегін үзді. Кремль Қытай қажетті құрамдас бөліктерді жеткізеді деп үміттенді, бірақ Пекин Батыс санкцияларын бұзудан бас тартты және Украинадағы соғыс басталғалы Мәскеуге әскери техника мен оның бөлшектерін сатқан жоқ.  

Ресейге Солтүстік Кореядан бөлек Иран да көмекке келді. Тамыз айының соңында АҚШ Ресейге ирандық ұшқышсыз ұшақтардың бірінші партиясы келгенін хабарлады. Алайда олардың кейбірінде техникалық ақаулар бар екені белгілі болды.