Енді қазақстандықтар үшін құжат рәсімдеу жеңілдейді

Мәжіліс мемлекеттік қызметтер көрсету мәселелері бойынша өзгерістер мен толықтырулар енгізу туралы заң жобасын бірінші оқылымда мақұлдады. Заң жобасы мемлекеттік қызметтер көрсету мәселесінде "бір терезе" қағидатынан "бір өтініш" қағидатына көшу, мемлекеттік қызметтерді толығымен электронды форматқа көшіруді көздейді. Бұл туралы Sputniknews.kz хабарлайды. 

Биыл электронды форматқа 80 проценті ауысса, келесі жылы тағы 10 проценті көшірілмек. Құжаттың басты жаңалығы – "прописканы" алып тастау.

Мәжіліс депутаты Майра Айсинаның айтуынша, қазір адамдар тіркелген жеріне байланғаннан кейбір қызметтерді өзіне ыңғайлы етіп алмайды.

"Осыған байланысты, азаматтық хал актілерін тіркеудің барлық жеті түрі бойынша қызмет көрсетудің эксаумақтық қағидатын енгізу тұрғысында түзетулер енгізіліп отыр. Бұл қағидатты енгізу арқылы азаматтың өтінішті тұрғылықты жері бойынша беруі міндетті емес. Өз қалауы бойынша Қазақстан аумағындағы кез келген тіркеуші органға бере алады", - деді депутат мәжілістің жалпы отырысында.

Бұл бала туу, неке қию немесе оны бұзуды, адамның қайтыс болуы, атын, әкесінің атын және тегін өзгертуді, асырап алуды, әке болуды анықтауды тіркеуге байланысты.

Бұған қоса, сыбайлас жемқорлыққа жол бермеу және бизнеске қолайлы жағдай жасау үшін орта және ірі кәсіпкерлік субъектілерін тіркеуді толығымен электронды форматқа көшіру әрі құжаттар тізбесін оңтайландыру көзделіп отыр. Енді электронды өтініштен кейін жеке кәсіпкерлікті тіркеу қазіргідей бір күн емес, бір сағатта іске асырылады.

Сондай-ақ, Айсина заң жобасында әке болуды белгілеу мен асырап алуды мемлекеттік тіркеуді алып тастау көзделгенін атап өтті. Өйткені әке болуды белгілеу және асырап алу туралы шешім шығарған сот осы шешімді тіркеуші органға электрондық түрде жібереді.

"Бұл қағаз құжат айналымын едәуір қысқартып, бланкіге жұмсалатын шығындарды азайтады. Бұған қоса, асырап алу құпиясы сақталады, себебі асырап алу/әке болуды анықтау туралы куәлік қолға берілмейді", - деді депутат.

Мәжіліс депутаттары бұл заң жобасын бірінші оқылымда мақұлдады.