Күзетшіні айуандықпен өлтірген экс-депутаттың ұлын тергеу тоқтатылды

Алматыда "Меркур Тауэрс" тұрғын үй кешенінің күзетшісін ұрып-соғып, көлікпен бірнеше рет басқан экс-депутаттың ұлын тергеу тоқтатылған, деп хабарлайды Bugin.kz порталы madeniportal.kz сайтына сілтеме жасап.

Қала прокуратурасының мәліметінше, кісі өлтіру дерегі бойынша сотқа дейінгі тергеу 29 наурыз күні басталған. Алайда іс тоқтатылған.

"Қазір қылмыстық қудалау органы Қылмыстық іс жүргізу кодексінің 45-бабының 7-бөлігінің 4-тармағы негізінде сотқа дейінгі тергеп-тексеруді тоқтату туралы шешім қабылдады", – делінген ведомство хабарламасында.

Көрсетілген бапқа сәйкес, сотқа дейінгі тергеп-тексеру мерзімі заңда белгіленген тәртіппен куәландырылған күдіктінің, айыпталушының психикасының уақытша бұзылуы немесе өзге де ауыр сырқаты болған жағдайда тоқтатылады. 

Еске салайық, бұған дейін Алматыда 45 жастағы ер адам өзі тұратын тұрғын үй кешенінің күзетшісін айуандықпен өлтірген еді. Кейін ол 14-қабаттан секірмек болған.  

Айта кетейік, күдікті – XIII шақырылған ҚР Жоғарғы Кеңесінің бұрынғы депутаты (1994-1995), Талдықорған облысы прокурорының аға көмекшісі болып қызмет атқарған Саламғазы Тастандиевтің ұлы.