Алматы облысында құдықтан мәйіті табылған үш адам туралы тың дерек шықты

Алматы облысы Кеген ауданында құдықтан табылған үш адамның оқиғасы туралы тұрғындар мен марқұмның туыстары тың дерек айтты. Бұл туралы Bugin.kz порталы КТК арнасына сілтеме жасап хабарлайды.

«Бірінші інімді алып шықты. Қарасақ, денесі суып кеткен. Бірінші көмектен кейін құсып жіберіп, көзін ашты, болды. 

«Жүріп кеткен» деді. Одан кейін Серік деген ағаны шығарды. Үшіншісінде, түбіне жете алмай, су болып тұр іші. Өрт сөндірушілер суды сорғызып, баланы шығарып алды. Ол кезде бала көгеріп кеткен», - дейді марқұмның туысы Дина Айтбаева. 

Телеарна ақпаратынша, қайғылы оқиға кеше болған. Үйінде су тоқтап қалған соң, әкесі мен баласы кешқұрым құбырды тексеруге барады. Жанында көршісі де болған. Бастапқыда бір қарап шығуға 15 жастағы жасөспірім түскен екен. Бірақ көп ұзамай сонда талып қалады. 

Әкесі құтқаруға ұмтылғанымен, кері шыға алмай, ес-түссіз құлаған. Артынан 56 жастағы көршісі түсіп, ол да төменде тіл тартпай кеткен. 

Туыстарының сөзінше, құдықтың беті көлік жүретін жолдан бір қарыс төмен орналасқан. Топырақпен көміліп жатқанына бір айдан асыпты. Бітеу тұрып, ауа айналымы жүрмегендіктен, ішінде улы газ пайда болуы мүмкін дейді олар.

«Су жүргізілгеннен кейін жол салынған кезде технология бойынша құдықтың беті көтеріліп тұру керек. Жол салған мердігер көтеріп, асфальтпен бірдей жасап кету керек болатын. Тұрғындар құдықтың бетін ашып қойған. Соңғы бір жарым айда Кеген ауылында дренажды канал жүргізілді. Сол кезде құдықтың бетін өздерінің топырағымен бекітіп кеткен», - дейді марқұмның туысы Мақпал Шадан.

Туыстары құдықтың ішінде тоқ ұруы мүмкін деген болжамды да айтып отыр. Аталған жайтқа қатысты тиісті мекеме өкілдері жауап берді. 

«2020-2021 жылдары жолды қабылдап алған кісі қазір қызметте жоқ. Не себепті дәл судың үстіне жол салып өткенін айта алмаймын. Мынаның бетін көтеру жұмыстарын істейді. Көліктер өте алатындай етіп жасаймыз», - дейді Кеген ауданы жолаушылар көлігі және автомобиль жолдары бөлімінің басшысы Жасұлан Кәділ. 

Қазір марқұмдардың денесі Қонаев қаласында. Марқұмдардың неден қайтыс болғаны сараптама қорытындысынан кейін белгілі болады.