Түркістан облысының тумасы Греция төрінде көк туды желбіретті

Түркістан облысының тумасы, Әлем чемпионатында джуи-джитсудан күміс жүлде иегері Жүніс Қаракөз Нұрланқызы Греция төрінде көк туды желбіретті. Bugin.kz тілшісі табанды еңбек арқылы келген жеңісті чемпионат туралы Қаракөзден сұрап білді. 

Қаракөз Түркістан облысы Келес ауданы Атақоныс ауылының тумасы. Ауылдағы №33 “Құркелес” (қазіргі №53 “Құркелес”) жалпы орта мектебінің түлегі. Қаракөз спортқа деген қызығушылығының мектеп кезден басталғанын айтты. 

“Ең алғаш 15 жасымда бокспен айналысып бастадым. Боксқа 2-3 жыл қатарынан қатысып жүрдім. Облыстық, республикалық сайыстарда жеңіспен оралдым. Бірақ белгілі бір жағдайларға байланысты 1-2 жыл спорттан бас тартқан кездер болды”, - дейді спортшы қыз. 

Бірақ Қаракөздің спортқа деген махаббатты алыс кетуіне жол бермеді. Ол уақытша үзілістен кейін, спорттың джиу-джитсу түріне қадам басқан. Спортшыдан бұл спорттың ерекшелігі туралы сұрап білдік. 

"Джиу-джитсу — жапондықтардың дәстүрлі, ұлттық күресі. Бұның ерекшелігі шабуыл жасаған қарсыласты қара күшті қолданбай арнайы әдістермен жеңу. Шабуылшының бағытын өзгертуге, тепе-теңдік қалпынан айыруға тырысамыз”, - дейді Қаракөз. 

26 жастағы бойжеткеннің джиу -джису мен ММА аралас жекпе-жекке деген қызығушылығы тым жоғары екен. Тіпті сөзбен жеткізу мүмкін еместігін айтты.

Қаракөз Грецияда өткен Әлем чемпионатында бақ сынап, жүлделі II - орынды иеленді. Оған дейін спортшы Шымкент қаласында Азия чемпионы атанған. 

Әлем чемпионаты болғандықтан Грециядағы сайысқа көптеген мемлекеттер қатысты. Оның арасында  Тайланд, Тәжікстан, Индия мемлекеттері де болды. Қарсыласынан тайсалмайтын қазақ қызының рингке шығар алдындағы сезімін сұрадық. 

“Рингке  шығар алдында ешқандай сезім болмады. Себебі ең алғашқы жарысым емес. Және ештеңе ойламауға тырыстым. Тек жеңіске жетуді ойладым, өзіме сенімді едім”, - деді қайсар қыз. 

Ал медаль мойнына ілген кездегі спортшының сезімі тым ерекше болыпты. Көзіне жас алғанын да жасырмады. 

“Медаль алған соң сезім ерекше болды ғой. Көзге еріксіз жас келеді. Өзге елде өз еліңнің әнұранын шырқату — ол бөлек сезім”, - дейді бойжеткен. 

Спортшы қызды атақоныстықтар құшақ жая қарсы алды. Мектепте арнайы іс-шара өтті. Қаракөздің жеңісімен мақтанған ауыл тұрғындары шараға түгел жиналды. Олар Қаракөзге 200 мың теңге көлемінде ақшалай сый ұсынды. Тіпті спортшы қыздың ата-анасы мен  алғашқы ұстаздарына да сый-құрмет көрсетілді. 

Қаракөздің ел намысын қорғап келгеннен кейінгі қуанышы көпке созылмағандай. Себебі әкімдік тарапынан чемпион қызға деген сый-сияпат мүлдем болмаған. Әуежайдан ұстаздары мен туыстары күтіп алды. Бірақ спортшы қыз әкімдік тарапынан ешқандай қолдау болмағанын айтты. 

“Іште кішкене өкінішім бар. Әлем чемпионаты деген оңай емес қой. Оған бару да, тіпті орын алу да оңай емес. Чемпионатқа бару үшін талай еңбек еттім. Ол жерге бару үшін көп теген іріктеулерден өтесің. Сондықтан еңбегім бағаланбағанына кішкене өкінемін”, - деді Қаракөз Нұрланқызы. 

Спортшы қыздың айтуынша, өңірлік "Сәт" телеарнасында ауыл әкімінің көмекшісі сөз сөйлеген. Ол Қаракөзге "сый-сияпат бердік" деп айтқан көрінеді. Бірақ ол сөздер жалған болып шықты. Спортшыны ауылға шақырар алдын "әкімнің жеке сыйлығы бар" деп те айтқан. Қаракөз Нұрланқызы ешкімге реніші жоғын айтты. Тек өтірік сөз айтылғанына наразы. 

Іштей реніші болғанымен қайсар қыз спорттан бас тартпайды. Себебі оның алдында спорттық мансабы күтіп тұр. Қаракөздің алдағы жоспары OCTAGON кәсіпқой спорттық лигада өнер көрсету екен. Ал спорт жолындағы негізгі арманы, үлкен лигалардан бой көрсетуді қалайтын көрінеді.