Алматыда күзетшіні қатыгездікпен өлтірген экс-депутаттың ұлына қатысты сот басталды

Алматыда "Меркур Тауэрс" тұрғын үй кешенінің күзетшісі Нұрбол Қайыпбаевты аяусыз ұрып өлтірген күдіктіге қатысты сот басталды, деп хабарлайды Bugin.kz порталы.

Аталған іс бойынша сот отырысы жабық форматта өтуде. Себебі күдіктіге бір емес, екі айып тағылып отыр. Ол әлеуметтік желіде танысы жайлы порнографиялық мазмұндағы материалдарды да таратқан. 

Айта кетейік, бұған дейін Алматыда бұрынғы депутаттың ұлына қатысты қылмыстық іс сот қарауына жіберілгені туралы жазған едік. Оған аса қатыгездікпен адам өлтіру және жеке өмір туралы мәліметтерді рұқсатсыз тарату бойынша айып тағылған.

Тергеу мәліметтері бойынша, 2024 жылдың наурыз айында сотталушы тұрғын үй кешендерінің бірінің күзетшісін жол талғамайтын көлігімен бірнеше рет соғып, кейін көліктен түсіп, соққыға жыққан. Күзетші ауруханаға жеткізілгенімен, аман қалмады. Сонымен қатар күдікті әлеуметтік желіде танысының қатысуымен түсірілген порнографиялық бейнематериалдарды таратқан деп айыпталып отыр.

Еске салайық, 2024 жылы наурызда жантүршігерлік оқиға орын алды. Алматыдағы "Меркур Тауэрс" тұрғын үй кешенінде ер адам күзетшіні қадыгездікпен өлтірді. Оны жол талғамайтын көлігімен бірнеше рет қағып, соққыға жыққан. Күзетші ауыр жағдайда ауруханаға жеткізіліп, сол жерде көз жұмды.