Алматы облысында қаза тапқан ер адамның ағзасы 6 адамға салынды

Алматы облысында қаза тапқан ер адам 6 адамның өмірін сақтап қалды, деп хабарлайды Bugin.kz порталы. 

Мәліметтерге сүйенсек, 16 қаңтарда 45 жастағы ер адам өз үйінің ауласында құлап, басынан қатты жарақат алған. Дәрігерлер ер адамға "жабық ми жарақаты, ми қысылуы, субдуральды гематома" диагнозын қойды. Науқасқа сол күні ота жасалды. Бірақ 19 қаңтар күні дәрігерлер тобы ер адамнан ми өлімін анықтады.

"Сол күні трансплантация үйлестірушісі марқұмның ағасымен әңгімелесіп, ол оның жалғыз жақын туысы екенін анықтады. Марқұмның балалары мен жұбайы болмаған. Ағасы біраз ойланып, ағасының ағзаларын трансплантация кезегінде тұрған адамдарға беру туралы келісімін берді. 20 қаңтар күні түнде марқұмнан екі бүйрек, жүрек, өкпе және көздің қасаң қабағы алынды”, – дейді республикалық трансплантация және жоғары технологиялық медициналық қызметтерді үйлестіру орталығының директоры Айдар Ситказинов.

Екі бүйрек жасөспірімдерге трансплантацияланған. Ал жүрек трансплантациясы алматылық науқасқа жасалған, ол бірнеше жыл бойы жасанды жүрекпен өмір сүріп келген екен. Өкпе Астанада 42 жастағы науқасқа трансплантацияланды. Бірнеше күннен кейін Алматы облысының екі тұрғынына көздің қасаң қабағы трансплантацияланды.