Қазақстаннан үшінші елге картоп шығаруға тыйым салынды

Қазақстан картоп бағасының тұрақтылығын сақтау мақсатында оның үшінші елдерге экспортын уақытша тоқтатты, деп хабарлайды Bugin.kz порталы.

Қазіргі уақытта көршілес елдер тарапынан қазақстандық картопқа жоғары сұраныс сақталуда. 2024 жылдың қорытындысы бойынша 605 мың тоннаға жуық картоп экспортталған, бұл 2023 жылғы көрсеткіштен (411 мың тонна) 1,5 есе артық. Бұл көрсеткіш соңғы 10 жылдағы рекордтық деңгейге жетіп, ішкі нарықтағы бағаларға айтарлықтай әсер етті.

Осыған байланысты, нарықтағы жағдайды тұрақтандыру және бағаның өсуіне жол бермеу мақсатында 2025 жылғы 18 қаңтарда өткен Сыртқы сауда саясаты және халықаралық экономикалық ұйымдарға қатысу мәселелері жөніндегі ведомствоаралық комиссияның шешімімен Қазақстан Республикасының аумағынан барлық көлік түрлерімен картопты үшінші елдерге экспорттауға, Еуразиялық экономикалық одақ елдерінен басқа, 6 ай мерзімге шектеу енгізілді, – деп жазылған министрлік хабарламасында.

Бұл шектеу ҚР Ауыл шаруашылығы министрінің 2025 жылғы 27 қаңтардағы №26 бұйрығымен бекітілді.

Қабылданған шаралар картоп бағасының алыпсатарлық жолмен өсуіне және нарық қатысушылары тарапынан орын алуы мүмкін спекулятивті әрекеттерге жол бермеуге мүмкіндік береді.