Қазақстандықтардың АҚШ-тан шығарылатыны рас па — министрлік мәлімдеме жасады

Сыртқы істер министрлігінің ресми өкілі Айбек Смадияров АҚШ-тағы 365 қазақстандықтың депортациялатыны туралы ақпаратты жоққа шығарды, деп хабарлайды Bugin.kz порталы.

“Соңғы күндері БАҚ және әлеуметтік желілерде АҚШ-тың жаңа президенті заңсыз мигранттарды жаппай депортациялайды деген жаңалық тарап жатыр. Бұл ақпараттың көпшілігі Fox News-тың хабарламасына негізделген. Сонымен қатар осы ақпаратта депортацияланатындардың ішінде 369 қазақстандық та бар делінген. Біз бұл мәліметті тексердік. Нәтижесінде, Fox News бұл жаңалықты 2024 жылдың 11 желтоқсанындажариялағаны белгілі болды. Бұл ақпарат АҚШ-тың қазіргі көші-қон саясатына еш қатысы жоқ”, – деп түсіндірді Смадияров.

Оның сөзінше, бір мемлекет заңсыз келген шетелдік азаматтарды елден шығаруға шешім қабылдаса, ол туралы Қазақстан елшілігіне немесе консулдығына хабарлауға міндетті емес.

Еске салайық, бұған дейін Қазақстан елшілігі АҚШ-та жүрген қазақстандықтарға ескерту жасаған еді. 

“Қамауға алу және елден шығару сынды мәжбүрлеу шараларымен қатар, АҚШ-қа қайта кіруге шектеулер енгізіліп, сондай-ақ әлеуметтік көмек, жұмыс істеуге рұқсат беретін құжаттар мен басқа да әлеуметтік жеңілдіктерді жою қарастырылып отыр”, - делінген хабарламада.