Олимпида чемпионы Бақыт Сәрсекбаев президенттің тапсырмасымен елге оралды

Бокстан 2008 жылғы Бейжің Олимпиадасының чемпионы Бақыт Сәрсекбаев елге оралды, деп хабарлайды Bugin.kz порталы. 

Боксшы бұл туралы әлеуметтік желідегі парақшасында жазды. Ол елге президенттің тапсырмасымен келгенін айтты.

"Мені президенттің тапсырмасымен Туризм және спорт министрі шақырды. Маған министрдің берген тапсырмасы -  Ұлттық құрама жанынан резервтік құрама құру. 12-19 ақпан аралығында 18-22 жас аралығындағы боксшылар арасынан резервті құрамаға іріктеу чемпионаты өтеді. Сол құрамада жүлделі орынды еншілеген жас боксшылар менің қол астымда жаттығуды бастайды”, - деп жазды боксшы. 

Бақыт Сәрсекбаев резервтік құрама құру  Олимпиадаға баратын спортшыларды шыңдауға көмектесетінін мәлімдеді. 

"Қазіргі ұлттық құрама өзінің жағдайын Олимпиадада, Азия Чемпионатында көрсетті. Спортшылардың бұлай әлсіреуі бәсекелестіктің жоқтығы. Өз салмағында теке тіресіп тұрған мықты бәсекелесі болмаса, спортшы өспейді, босаңсып кетеді. Мен ең мықты ұлттық құрамада болдым, ол кезде Бақтияр Артаев, Серік Сапиев, Гена Головкин, Серік Елеуов, Қанат Әбутәліпов, Мейіржан Рахымжанов, Галиб Джафаров сияқты кіл мықтылар болды. Бір салмақта 5-6 мықтыдан болдық", - дейді ол. 

Боксшы спортшыларға босаңсуға болмайтынын айтып, кеңес берді. Әрі жүрегінде түгі бар, Олимпиада чемпионы боламын деген ниеттегі спортшыларды өз қарамағына шақырды.