Семейде аяусыз соққыға жығылған балаға халық 24 млн теңге жинап берді

Семейде жасөспірімдер әлімжеттік көрсеткен 6-сынып оқушысына халық 24 млн теңге жинап берді, деп хабарлайды Bugin.kz порталы.

Бұл туралы Абай облысындағы бала құқықтары жөніндегі уәкіл Эльзира Жүнісова айтты. Халық бұл қаражатты баланың отбасына жинап берген. Енді бұл ақшаға үй сатып алуға жұмсау жоспарланып отыр. Қазіргі таңда 5 баласы бар отбасы жалдамалы пәтерде тұрады екен. 

"Баспана сатып алудың ашықтығын қамтамасыз ету үшін облыстық және қалалық мәслихат депутаттарының, заңгерлер мен қоғамдық бірлестіктер өкілдерінің қатысуымен комиссия құрылады", - деді Эльзира Жүнісова.

Еске салайық, әлеуметтік желіде бір топ жасөспірім мектеп оқушысын соққыға жыққан видео тарады. Жәбірленуші 6-сынып оқушысы екен.  
Бұзақылар оқушының басынан, кеуде тұсынан тоқтаусыз тепкілеген. Қазір бұл оқиға бойынша қылмыстық іс қозғалды. Тәртіп бұзған балалардың ата-аналары полицияға жеткізілді. Жасөспірімдер арнайы есепке қойылып, олардың тәртібін кәмелетке толмағандар құқығын қорғау жөніндегі комиссия қарайды.