Дариға Назарбаева Ватиканға барады

Сенат басшысы Дариға Назарбаева Ватиканның денсаулық сақтау саласымен бірігіп, ел медицинасын жақсартуды ойлап отыр. Ватикан дәрігерлері Қазақстанға келіп, отандық дәрігерлерге балаларға қалай көмек көрсету, мамандарды қалай дайындау керектігін үйретпек.

Мұндай ұсынысты Дариға Назарбаева Ватиканның Қазақстандағы Апостоль Нунцийі Фрэнсис Ассизи Чулликатты қабылдаған кезде айтқан.

- Сенат Төрағасы Ватикандағы педиатриялық клиника қызметінің табысты тәжірибесін атап өтіп, қазақстандық балаларға медициналық көмек көрсету және дәрігерлерді озық технологияларға оқытуды қамтамасыз ету үшін Ватикан мен Қазақстанның Денсаулық сақтау министрлігі арасындағы ынтымақтастықты қалыптастыруды ұсынды, - деп хабарлайды ҚР Парламент сенатының ресми сайты.

Одан бөлек, Дариға ханым Әлемдік және дәстүрлі діндер лидерлерінің VII Съезіне дайындық барысында Ватиканға баруды жоспарлап отырған көрінеді.