Түркістан облыстық жедел жәрдем қызметі жаңа 16 медициналық көлікпен толықты

Салтанатты шараға Түркістан облысы әкімінің орынбасары Жолдымұрат Аманбаев және облыстық қоғамдық денсаулық басқармасының басшылығы мен медицина саласының қызметкерлері қатысты. 

Дамыған елдердің бір жоғары көрсеткіші - дер кезінде жететін жедел жәрдем. Бүгінгі таңда облысымызда жедел жәрдем көрсету станциясы мен оған қарасты аудандық бөлімшелер қызмет көрсетеді. Адам өміріне бірден-бір жауапты саланың ісі ілгері дамуы үшін бүгін 16 бірдей жедел жәрдем көлігі қолданысқа берілді. Жиыннан соң «Газель-NEXT» маркалы автокөліктер облыстық жедел жәрдем станциясының аудандық бөлімшелеріне жіберілді. 

Көліктер соңғы үлгідегі өкпені жасанды желдету аппаратымен, электрокардиограф, аспиратор және басқа да аса қажетті құрал-жабдықтармен жабдықталған. Алдағы уақытта облыстың медицина саласын қосымша тағы 26 арнайы көлікпен қамту жоспарлануда.