5 желтоқсан кинопремьералары

Бүгін прокатта: Томас Эдисон рөліндегі Бенедикт Камбербэтч, Эдвард Нортон өзі түсірген фильмде басты рөлде, Айдаһарлар анасы ромкомда, қазақстандық актерлер стритрейсинг кинода, детектив рөліндегі Қара Пантера және басқа да қызықтар.

«Ток соғысы» («Война токов» / «The Current War») [12+]: Бенедикт Камбербэтч, Том Холланд, Майкл Шеннон, Николас Холт, Кэтрин Уотерстон секілді Голливуд жұлдыздары жиналған тарихи драма.

Фильмдегі оқиғалар 1880 жылдары өрбиді. Атақты өнертапқыштар Томас Эдисон мен Джордж Вестингауз арасында тұрақты және ауыспалы токты пайдалану төңірегіндегі текетірес болған еді. Эдисон АҚШ-та тұрақты токтың таралуын қолдады, ал Тесла мен Вестингауз ауыспалы токқа өту қажет деп санады.

«Жетімсіреген Бруклин» («Сиротский Бруклин» / «Motherless Brooklyn») [18+]: Эдвард Нортонның режиссерлік жұмысы. Басты рөлде де өзі, сондай-ақ сценариін жазып, продюсерлігін атқарды.

Фильм Лайонел Эссрог деген Туретт синдромына шалдыққан жалғыз басты детектив төңірегінде өрбиді. Ол тәлімгерінің және жалғыз досы Фрэнктің өлімін тергемекші. Оның қолында азғантай ғана айғақ бар. Құпияны ашу мақсатымен Гарлемнің джаз клубтарын, Бруклиннің қауіпті көшелерін, элита көңіл көтеретін алтындатылған орындарды аралауға тура келеді. Ол досының атын ақтап алу үшін гангстерлердің ашуына тиеді, жемқорлықтың бетін ашып, қаланың ең қауіпті адамына ұрынады.

«Соңғы Рождество» («Рождество на двоих» / «Last Christmas») [16+]: «Тақтар ойыны» сериалының жұлдызы Эмилия Кларк түскен романтикалық комедия.

Сюжетте Рождество тауарларының дүкенінде істейтін Кейт өміріне алаңдауды әлдеқашан қойып, ішімдікке салынып кеткен. Бірақ Том есімді сүйкімді жігітпен танысқаннан кейін бәрі өзгереді.

«Жарыс» («Гонка») [14+]: Қазақстан кинематографшылары түсірген экшн. Сюжет өзегі – автомобиль жарысы.

Басты кейіпкерлер – ата-анасыз өскен Жанель. Кішкентайынан көше тәрбиесімен өсіп, ағасынан автокөлік жарысы бойынша тәлім алған қыз – қаланың үздік шабандозы саналады. Осындай заңсыз сайыстардың бірінде жеңілген Влад есімді бір жігіт одан кек алуды көздейді.

«21 көпір» («21 мост» / «21 Bridges») [16+]: бұл америкалық боевикте Marvel киноғаламында Қара Пантера рөлімен белгілі Чедвик Боузман ойнайды. Одан бөлек Сиенна Миллер, Тейлор Китч, Дж.К. Симмонс секілді белгілі актерлерді көруге болады.

Сюжетте наркодилерлерді ұстамақ болған 8 Нью-Йорк полицейі қаза табады. Детектив Андре Дэвиске қылмыскерлерді тауып, әріптестерінің кегін қайтару тапсырылады. Ол Манхэттенді толығымен бұғаттау үшін, қаламен байланыстыратын 21 көпірді жауып тастайды.

«Аэронавттар» («Аэронавты» / «The Aeronauts») [16+]: оқиғасы өмірден алынған британ драмасы. Басты рөлдерде - Фелисити Джонс пен Эдди Редмэйн.

Фильмдегі оқиға 1862 жылы Лондонда болады. Әуе шарын басқаруға құмар ауқатты әйел мен ғылыми жаңалық ашуды армандап жүрген зерттеуші метеорологты тағдыр жолықтырды. Екеуі аэростатпен қауіпті саяхатқа аттанады.

«Аң» («Зверь» / «Biseuteu») [16+]: Оңтүстік Корея режиссері Ли Джон-хо түсірген детектив.

Сюжетте бір-бірін ұнатпайтын екі тергеуші бірлесе жұмыс істеуге мәжбүр болады. Олар теңіз жағасында табылған қыз денесіне қатысты істі қолға алады. Лас істің түбіне жеткенше екеуінің де қолы былғанатыны сөзсіз.

Бұлардан бөлек премьералар қатарында келесі фильмдер бар:

- «Біртүрлі шындық» («Рожденный после смерти» / «Strange But True»); триллер (Канада).

- «Решала. Нулевые»; боевик, драма, триллер (Ресей).

- «Пароль: Хаус» («H0us3»); үрейлі, фантастика, триллер (Испания).

- «Маусым соңы» («Конец сезона»); триллер, мелодрама (Ресей).