Фариза Оңғарсынованың жырларын оқу: Алматыда әдеби байқау өтті

Мемлекет және қоғам қайраткері Фариза Оңғарсынованың 80 жылдығы аясында Алматы қаласында студенттер арасында байқау өтті.

Бұл байқау Алматыда алғашқы рет ұйымдастырылды. Аталмыш сайысқа Алматы қаласындағы жоғары оқу орындарының студенттері қатысты. Сайысқа қатысушылар онлайн дауыс беру арқылы іріктеліп, оның ішінде арнайы бейнебаян түсіргендері ақтық кезеңнің жолдамасына ие болған.

Байқау үш бағыт бойынша өткізілді. Олар: «Жырың қалды жанымның ұшқынындай», «Әуелеген әсем ән», «Жыр жазамын жүрекпен» кезеңдері. Әр кезеңнің жеке тақырыптары да қойылған. 1-кезеңде жастар Фариза Оңғарсынованың өлеңдерін мәнерлеп оқыды, 2-кезеңде ақынның сөздеріне жазылған музыкалық туындыларды орындады, ал 3-кезеңде қатысушылар арнау жырларын ұсынды.

Байқауға қатысушылардың өнерін жазушы, журналист Бейбіт Сарыбай және актриса Нұргүл Мыңғатова бағалады.

«Жырың қалды жанымның ұшқынындай» атты кезең бойынша Абылай хан атындағы Қазақ халықаралық қатынастар және әлем тілдері университетінің студенті Жанар Жексенова бас жүлдеге ие болды. Бірінші орынды Қазақ ұлттық қыздар педагогикалық университетінің студенті Нұрай Айтбаева алса, екінші және үшінші орындарға әл-Фараби атындағы Қазақ ұлттық университетінің студенттері Құмарбек Нұркен мен Сағыныш Балтабай иеленді.

«Әуелеген әсем ән» кезеңінде Қазақ ұлттық қыздар педагогикалық университетінің студенті Алуа Тұмарбай бірінші орынды қанжығалады. Екінші орынды әл-Фараби атындағы Қазақ ұлттық университетінің студенттері Жанәлі Бекзатхан мен Мағжан Датқа иеленсе, үшінші орынға Қыздар университетінің студенті Ақерке Жаһанқызы ие болды.

«Жыр жазамын жүрекпен» бағыты бойынша Абылай хан атындағы Қазақ халықаралық қатынастар және әлем тілдері университетінің студенті Диана Ізбасар дара шауып, бас жүлдені олжалады. Қыздар университетінің студенті Ақтолқын Жолаушыбай бірінші орынды, әл-Фараби атындағы Қазақ ұлттық университетінің студенті Қанат Ерболат екінші орынды және осы оқу орнының студенті Бауыржан Асқарұлы үшінші орынды иеленді.

Байқау жеңімпаздарына «Алғыс хат», бағалы сыйлықтар және арнайы дипломдар берілді.

Қазақ ұлттық қыздар педагогикалық университетінде болған бұл байқау «Ақ қауырсын» жастар шығармашылық клубының ұйымдастырумыен өтті.