Қоғамдық тәртіп: Алматыда полиция қызметкерлері бақылау жүргізуде

Алматы қоғамындағы тәртіпті сақтау мақсатында тәулік сайын полиция қызметкерлері патрульдеу жүргізеді. Дәлірек айтқанда, полициядағы 1650 қызметкер 550 бағыт бойынша жұмыс жасайды. Жаңа ақпарат жайында Алматының полиция департаментінің басшысы Серік Күдебаев айтып өтті.

Оның айтуына қарағанда, 32 учаскеде патрульдеу қызметкерлерінің саны 350 адамға дейін көбейді. Бұл өзгеріс мұнда болатын қылмысты 17,4 пайызға дейін қысқартуға мүмкіндік берген. Аталған учаскелерде қылмысты «ізін суытпай» ашу 11,8 пайызға артыпты.

Алматы әкімінің айтуымен ашылған полицияның 23 мобильді пунктіне қазірдің өзінде 2,5 мың адам жүгінген. Оларға полиция тарапынан құқықтық және заңнамалық көмек көрсетілген.

Серік Күдебаевтың жоспарлауы бойынша осы секілді пункттердің саны 32-ге дейін көбейеді. Сонымен қатар олар адамдар көп жиналатын жерлерге орнатылады деп жоспарлануда.