Шымкент жастарының бастамасы: Тегін кітап тарату алаңдары ашылды

Шымкент қалалық жастар ресурстық орталығы кітапсүйер қауым үшін қараша айынан бастап жақсы бір жоба бастады. Мұны буккроссинг деп атасақ болады. Басқалай айтқанда, кітаптарды алмасу дегенді білдіреді.

- Шымкентте мұндай буккроссинг-аймақтары адамдар көп шоғырланған жерлерде орнатылды. Олар – М.Әуезов атындағы Оңтүстік Қазақстан мемлекеттік университеті, Silkway Халықаралық университеті, «Береке» сауда орталығы, Қазпошта орталығы және Жастар ресурстық орталығында. Кітап алмастыратын әр алаңға отандық және шетелдік классиктердің есімі берілді Республикалық маңызы бар үш қала мен он төрт облыс орталықтарында  барлығы 17 кітап алмастыру акциясы жоспарлануда. Жаңа буккроссинг-аймақтарын ашу басқа да мәдени шаралармен бірге жүзеге асатынын айтып өту қажет, - дейді Шымкент қаласының Жастар ресурстық орталығының "Қоғаммен байланыс және ақпараттық талдау бөлімінің" басшысы Бижан Сәдібеков.  

Көлемді жобаны өткізудің мақсаты өте маңызды: кітап оқуға баулу және біздің қоғамдағы «кітап алмастыру мәдениетінің» деңгейін көтеру. Акциялар Жастар жылына арналған. Жобаны «Social Development Center»  Қоғамдық Фонды ҚР Ақпарат және қоғамдық даму министрлігінің қолдауымен «Азаматтық бастамаларды қолдау» Коммерциялық емес акционерлік қоғамының гранттық қаржыландыруы аясында жүзеге асырды.