Алматыда істі болған азаматтарды жұмысқа орналастыру науқаны өтіп жатыр

Алматыда қала әкімдігінің, прокуратураның және Nur Otan партиясы филиалының қолдауымен кезекті бос жұмыс орындары жәрмеңкесі өтті. Абақтыға отырып шыққан жұмыссыз азаматтарға 300-ге тарта жұмыс түрі ұсынылды. Олардың қатарында бухгалтер, мұғалім, сақтандырушы қызметтері мен құрылыс саласы мамандықтары бар.

Пробацияда 200-ден астам азамат есепте тұр. Сол кісілерді шақырдық. Оған қоса, қалалық жұмыспен қамту орталығында тіркеуде тұрған азаматтарды да шақырдық. Бұл азаматтарға 30-ға жуық компания жұмыс ұсынып отыр. Осы жерден азаматтар өздеріне керек жұмысқа орналасады деген үміттеміз, - деді Алматының Медеу ауданы әкімінің орынбасары Айдос Нұрлыбаев.

Қазір ауданда 630 адам жұмыссыздар есебінде тұр. Жыл басынан бері 900-ден астам адам жұмыспен қамтылған. Олардың басым бөлігі осындай жәрмеңкелердің арқасында қызметке орналасқан.