Шымкент қаласында үш жатақхана салынбақ

Қазіргі таңда Шымкент қаласындағы 10 жоғарғы оқу орны мен 29 колледжде 106 636 студент талапкер білім алуда. Оның ішінде, 6 614 студент жатақханамен қамтылса, 8 400 орынға қажеттілік туындап отыр.

Университет студенттерінің 6750-іне жатақхана қажет болса, техникалық білім беру ұйымдарының 1650 студентіне жатақхана қажет.

- Қазіргі таңда қаладағы жатақхана орнының қажеттілігін жою мақсатында әкімдік тарапынан «Шымкент сити» шағынауданынан 2,5 га жер учаскесі белгіленіп, «Shymkent» әлеуметтік кәсіпкерлік корпорациясы АҚ-ның инвестициясы есебінен 2500 орындық жатақхана салу үшін жобалау-сметалық құжаттары әзірленуде, - дейді Шымкент қалалық білім басқармасының басшысы Айгүл Текебаева.

Сонымен қатар, «Тұран» ш.а. жатақхана құрылысы үшін 4 га жер учаскесі бөлініп отыр.

2018 жылы жеке кәсіпкерлер мен «Қаржы орталығы» АҚ арасында 350 және 200 орындық жатақхана құрылысын салуға келісім-шарттар түзіліп, ағымдағы жылдың сәуір айында 350 жатақхана құрылысы аяқталып Оңтүстік Қазақстан мемлекеттік педагогикалық университетіне пайдалануға берілді. Ал, 200 орындық жатақхана құрылысы жыл соңына дейін аяқталады деп жоспарлануда.