Қос бірдей шымкенттік Токиода өтетін Олимпиада ойындарына жолдама алды

2020 жылы Жапонияның астанасы – Токиода өтетін жазғы Олимпиада ойындарына жолдама алған 23 саңлақтың арасында қос бірдей шымкенттіктер  бар. Жылжымалы стенд атушы мерген қыз Сәрсенкүл Рысбекова мен 50 метрге үш позицияда  нысана көздеуші Юрий Юрков – солардың санатында.

Сәрсенкүл Катардың астанасы Дохада өткен Азия чемпионатында екінші орынды еншілеп, күміс медальді жеңіп алды. Ол Бауыржан Тұманбаев басқаратын қалалық олимпиада ізбасарларын даярлау орталығында өзінің жеке бапкері, Қазақстанға еңбек сіңірген жаттықтырушы Александр Хасяновтан тәлім алады.

Өз кезегінде Юрий Юрков құрлық додасында алтыншы орынға табан тіреді. Жолдамаға иелік ету үшін спортшылар үздік үштікке ілігуі керек еді. Алайда, Азия чемпионатында жүлде салғандардың арасында Олимпиада лицензиясы иегерлері болғандықтан, жолдама алтыншы орынға дейінгі спортшыларға үлестірілді. Шымкент қаласында дүниеге келген Юрий  Мұхтар Әуезов атындағы Оңтүстік Қазақстан мемлекеттік университетінің түлегі, Халықаралық дәрежедеі спорт шебері  осылайша өзінің үшінші Олимпиадасына аттанбақ. Ол Балғабай Елшиев басшылық жасайтын қалалық жоғары спорт шеберлігі мектебінің өкілі. Қазақстанға еңбегі сіңген жаттықтырушы Садулла Юнусметовтің  төл шәкірті.