Қытайдағы вирус aдамдарға жыландар мен жарқанаттардан жұққан

Қытайдың Ухань қаласынан басталған коронавирус 2019 жылдың желтоқсан айының соңында тіркелген. 

Адамның тыныс жолдарын тез қабындыратын ауыр респираторлық синдром болып табылатын бұл вирус бүгінде әлемді дүрліктіріп отыр. Дүнежүзілік денсаулық сақтау ұйымы аталмыш вирусты «2019-nCoV» деп атады. Вирус 26 адамның өмірін қиып, жүздеген адам ауыр халде жатыр. Ондаған қала бұғатталған, адамдардың кіріп-шығуына тосқауыл қойылған. 

Коронавирус ауа арқылы жұғатыны анықталды. Ғалымдар бұл вирус жарқанаттан адамдарға крайт және кобра сынды жылан етін жеуден жұққан деген болжам айтуда. Жыландар көбіне жарқанаттармен қоректенеді. Вирустың ошағы саналатын Ухань қаласындағы базарда жылан саудасы ғасырлар бойы жалғасып келеді. 

Міне, сол жыландардан адамдарға вирус жұққан деп отыр ғалымдар. Әзірге вирусты емдеу жолы табылмады.