Шардарада бокстан облыс чемпионаты өтіп жатыр

Жарыстың ашылу салтанатына қатысқан Шардара ауданы әкімдігінің аппарат басшысы Ғалымжан Амантай шағалалы өңірде бокс спортының қарқынды дамып келе жатқанын тілге тиек етіп, былғары қолғап шеберлеріне сәттілік тіледі.

Ал бокстан Түркістан облысының жасөспірімдер құрама командасының аға жаттықтырушысы Олжас Сыздықов жас спортшылар жарысының үлкен дәрежеде ұйымдастырылғанын атап өтті. Салтанатты шарада өңірдің бокс спортын дамытудағы сіңіріп жатқан еңбектері үшін Шардара ауданы әкімінің алғыс хатымен және естелік сыйлығымен аға жаттықтырушы Олжас Маратұлы мен жарыстың бас төрешісі Ержан Оспанов марапатталды. Мұнан соң жас бокшылар шаршы алаңға шығып, өзара мықтыларын анықтады.

Айта кетейік, бүгінде аймақта жекпе-жекте жеңіске жетіп келе жатқан талантты спортшылар көп. Әрі өңірде боксты олимпиадалық бағытта дамыту мәселесі күн тәртібінен түскен емес. Бұл бағытта облыстық дене шынықтыру және спорт басқармасының басшысы Полат Қырықбаев мамандармен бірлесе отырып, боксты заман талабына сай дамытуды қолға алуда. Тәжірибелі бапкерлер мен талантты жастарға әрдайым қолдау көрсетуде.