Түркия-Иран шекарасында жер сілкінді

Түркия мен Иран шекарасында тағы да жер сілкінді. Кеше жергілікті уақытпен түнгі 23:44-те болған жер сілкінісінің қуаты 4 балл. 

Мемлекеттік сейсмологиялық институтының мәлімдеуінше, жерасты дүмпуі 6,4 шақырым тереңдікте тіркелген. Түркия-Иран шекарасында бірінші жер сілкінісі кеше таңғы 08:52-де болды. 

Зілзала ошағы Иранның Тебриз қаласынан батысқа қарай 141, Түркияның Өзалп қаласынан оңтүстік-шығысқа қарай 71 шақырым жерде тіркелді. Зілзала салдарынан Түркияның Ван провинциясында 9 кісі қаза тапты. 

50-ден астам кісі жарақат алды. 4 елді мекен жермен-жексен болды. 250-ден астам тұрғын үй қирап, 700- ге жуық ғимаратқа зақым келді. Мамандар аймақта тағы да жер сілкініс тізбегі орын алуы мүмкін деп ескертті.