Илон Маск Египет пирамидаларын өзгепланеталықтар салғанына сенімді

Space X, Tesla компанияларының негізін қалаушы Илон Масктың твиті тағы да шу тудырды. Жұма күні ол өз парақшасында «Әрине, пирамидаларды бөгде ғаламшарлықтар тұрғызған» деген жазба қалдырды. Артынша «Рамзес II (перғауын – авт.) солардың бірі болды» деп қосты ол. Содан кейін «Хеопс пирамидасы 3800 жылда салынған ең биік ғимарат» деген твит жазды. Соңында пирамидалардың шын мәнінде қалай тұрғызылғаны туралы BBC агенттігінің мақаласына сілтеме беріп, оны сенімді ақпарат көзі ретінде ұсынды.

Алайда оқырмандардың көбі конспирологиялық теорияны қолдау секілді жазылған алғашқы твитке көбірек назар аударды. Оны 86 мыңнан астам адам бөлісті.

Бұған жауап ретінде Мысырдың халықаралық әріптестік жөніндегі министрі Рания аль-Машат Илон Маскқа шақырту жіберді.

«Мен сіздің жұмысыңызды үлкен ынтызарлықпен бақылап отырамын. Сізді және Space X-ті пирамидалардың қалай салынғаны туралы жазбалармен танысуға, сонымен қатар оны тұрғызған адамдардың қабірлерін көруге шақырамын. Біз сізді күтеміз, Маск мырза», - делінген оның твитінде.

Масктың жазбасына мысырлық археолог Захи Хавасс та назар аударып, оның пікірін «галюцинация» деп атады.

Азаттық рухы