Трамп: Егер Байден жеңіске жетсе, Қытай Америкаға қожайын болады

Вашингтонда Республикалық партияның ұлттық конвенциясы аяқталды. Дональд Трамп келесі президенттік сайлауда екінші мерзімге үміткер болуға ресми түрде келісті.

Көптеген бақылаушылар оны Трамп конвенциясы деп атады. Бұл іс-шарада Президенттің төрт баласы, бірінші ханым Мелания Трамп, сондай-ақ бір ұлының әйелі және екіншісінің досы сөйледі.

Трамп өзінің сөзінде қарсыласы, АҚШ-тың бұрынғы вице-президенті Джо Байденді сынға алып, оны социализмнің троян жылқысы деп атады.

Ол Байденді Америкадан басқа елдерге жұмыс орындарын жылжытып және американдықтарды мұхиттың ар жағындағы шексіз соғыстарға жіберді деп айыптады.

"Егер Байден сайлауда жеңіске жетсе, Қытай біздің елдің қожайыны болады", - деді Трамп.