Ақжарқын Тұрлыбайдың қорғаушысы өтінішті бір емес, бірнеше рет жолдағанын айтты

Қытайда өмір бойына бас бостандығынан айырылған Ақжарқын Тұрлыбайдың қорғаушысы Сұңқар Нұрмағамбетов оны Қытайдан Қазақстанға ауыстыру туралы өтінішті бір емес, бірнеше рет жолдағанын мәлімдеді, деп хабарлайды Bugin.kz тәуелсіз авторлар платформасы Sputnik Қазақстан сайтына сілтеме жасап.

"Бүгін өткен брифингте бас прокурордың орынбасары Марат Ахметжанов қорғаушы тараптан Ақжарқын Тұрлыбайды елге ауыстыру туралы өтініштің түспегенін хабарлады. Осыған орай, 2016 жылы Ақжарқын Тұрлыбайдың адвокаты ҚР бас прокуратурасы мен сыртқы істер министрлігіне хат жазып, Ақжарқын Тұрлыбайды елге қайтаруға бастамашы болғанын хабарлаймыз", - деді Нұрмағамбетов.

Айтуынша, Қазақстанның ҚХР-дағы елшісі болған Шахрат Нұрышевтің ресми хаты да осы ақпаратты растай алады. Бұл жайында бұқаралық ақпарат құралдары да жазды.

"Одан кейін сот кезінде қорғаушы тарап Қазақстанның бас прокуратурасы мен сыртқы істер министрлігіне өтініш жіберді. 2020 жылы да осы іспетті өтініш жолданған болатын", - дейді Нұрмағамбетов.