Синоптиктер болжамы: Қазан айында ауа райы қандай болады?

Қазанда Қазақстанның солтүстігі мен орталық өңірлерінде күн суық болады, жаңбыр жауып, қарға ұласуы мүмкін, деп хабарлайды Bugin.kz тәуелсіз авторлар платформасы Қазгидромет синоптиктеріне сілтеме жасап.

"Қазан айында Қазақстанның солтүстік-шығыс, орталық, оңтүстік-шығыс өңірлеріне суық арктикалық ауа массалары келеді де Жерорта теңізінің шығыс жағалауынан еліміздің оңтүстік-батысына қарай жылы ауа массасы жылжиды. Соның нәтижесінде орташа айлық ауа температурасы республиканың басым бөлігінде климаттық норма шамасында болады. Қазақстанның оңтүстік-батыс жартысында нормадан 1°С жоғары, еліміздің солтүстік-шығыс бөлігінде нормадан 1°С төмен болады", - делінген синоптиктер болжамында.

Жауын-шашын мөлшері Қазақстанның басым бөлігінде нормаға жуық болады, еліміздің солтүстік-шығыс жартысында және Алматы облысының шығысында нормадан жоғары болады деген болжам жасалды.

"Алдағы күндері республиканың басым бөлігінде құрғақ және шуақты ауа райы болады", - деді мамандар.

Қазақстанның солтүстігінде ауа температурасы түнде -2...+7°С, күндіз ауа біртіндеп +12...+20°С-қа дейін жылынады. Ал оңтүстік өңір мен батыс аймақта түнде +5...+13°С, күндіз +17...+25°С болады.

5 қазаннан бастап Солтүстік циклонмен және арктикалық атмосфералық фронттардың әсерінен жауын-шашын түседі.

"Солтүстікте жаңбырдың соңы ылғалды қарға ұласуы мүмкін. Тұман түсіп,  желдің екпіні 15-23 м/с дейін күшейеді. Күндіз жауын-шашын тоқтап, түнде суық болады. Сондай-ақ, желсіз ашық ауа райы сақталады. Тек, еліміздің батысы мен оңтүстік-батысында жауын-шашын түспейді", - дейді Қазгидромет мамандары.