Шымкент әкімі қаладағы эпидемиологиялық жағдай туралы баяндады

Баспасөз мәжілісінде М.Дүйсенбекұлы, ең алдымен, қаладағы эпидемиологиялық ахуалға байланысты ашылған провизорлы орындар, жедел жәрдем қызметінің жұмысы және жұқпалы ауруларға шалдыққан науқастарға көрсетіліп жатқан көмектер жайлы айтты.

– Шымкент қаласында провизорлы орын саны 1 маусымға дейін 3 стационарда 320 төсек-орын, 30 маусымға дейін 23 стационарда 2 960 төсек-орын, ал 7 шілдедегі жағдай бойынша 3010 төсек-орын ашылды. Ал күндізгі стационарларда 1 маусымға дейін 1281 төсек-орын болса, қазіргі таңда 51 емханада 633 төсек-орын бар. Сондай-ақ, жұқпалы ауруханалардағы төсек-орынға 160 орын қосылып, ол 650-ге жеткізілді. Осы ретте науқастар жайлы айтсам, бүгінге дейін қалада пневмониямен ауырған 6340 науқас тіркелсе, оның 95,6%-ы ауруханаға жатқызылып, 60 пайызы емделіп шықты. Ал ЖРВИ-мен ауырғандардың 86%-ы емделуде және күндізгі стационарларда күніне орта есеппен 2000 науқас қамтылуда. Бұл ретте жедел жәрдем қызметі жайында жеткізсек, 1 маусымнан 6 шілдеге дейін шақырту саны 59 925-ке жеткен. Яғни, шақырту саны 2 есеге өсті. Осыған байланысты «103» диспетчерлік қызметтердің саны ұлғайып, оған қоса Call-орталығы (109, 1430) іске қосылды. Жалпы бүгінге дейін қаладағы жұқпалы аурулармен ауырған азаматтарға дер кезінде көмек көрсету мақсатында 56 мобильді топ құрылып, нәтижесінде 10 341 науқасқа қызмет көрсетілді», – деді қала әкімі.