Республикалық форумда шымкенттік жас эколог жүлделі орын алды

Білім алушыларды табиғатты қорғау қызметіне тарту, экологиялық мәдениеттілік пен  сауаттылыққа тәрбиелеу мақсатында ұйымдастырылған форумға  Шымкент қаласы атынан қалалық кезеңде жеңімпаз болған 6 оқушы қатысты. 

Бұл туралы қалалық білім басқармасының мамандары мәлімдеді.

Жыл сайын республика көлемінде өткізілетін форум 6 номинация бойынша ұйымдастырылды. Олар: виртуалды саяхат бойынша «Туған өлке тарихы» номинациясы, зерттеу жобалары - «Жасыл экономика» номинациясы мен «Денсаулық және қоршаған орта» номинациясы, видеороликтер презентациясы  бойынша «Экоболашақ» номинациясы, экодизайнерлер бойынша «Жасыл оазистер» номинациясы мен «Жеңіс мамыры» - панно немесе коллаж байқауы.

«Табиғатты аяла» форумның республикалық кезеңінің қорытындысының нәтижесінде №1 мамандандырылған IT лицей-интернатының оқушысы Әсеретбек Нұрасыл Нұрланұлы «Жасыл оазистер» номинациясы бойынша І-орынды иеленіп, ҚР БҒМ Республикалық қосымша білім беру оқу-әдістемелік орталығының I-дәрежелі дипломымен  және бағалы сыйлығымен марапатталды.

Ал «Экоболашақ» номинациясы бойынша №89 IT мектеп-лицейінің оқушысы Борашева Сара Асанқызы ынталандыру сыйлығын алды.

Сонымен қатар, Шымкент қаласынан қатысқан топтың жетекшісі «Экология, өлкетану және туризм орталығы» КММ әдіскері Алагозова Салтанат ҚР БҒМ Республикалық қосымша білім беру оқу-әдістемелік орталығының алғыс хатымен марапатталды. 

Шымкент қаласы әкімінің баспасөз қызметі