Ауасы ең қауіпті қалалар анықталды

"Қазгидромет" мамандары еліміздегі ауасы ең көп ластанған қалаларды атады. Рұқсат етілген шекті  нормалардан 4 қала асып кеткен деп хабарлайды Bugin.kz авторлар платформасы.

Атмосфералық ауа сапасына мониторинг 1-7 желтоқсан аралығында жүргізілді.

Нұр-Сұлтанда жол берілетін нормадан асып кетудің 973 жағдайы тіркелді. Қаланың ауасы Ақжол (ЖЭО), Көктал-1, Шапағат коммуналдық базарының аудандарында неғұрлым ластанған.

Алматыда шекті рұқсат етілген нормалардан асып кетудің 726 жағдайы тіркелді, қаланың ауасы әл-Фараби даңғылы, Науаи к-сі бұрышы, Орбита ш-а ("Зеленстрой" АҚ Дендропарк аймағы) ауданында басым ластанған.

Ал Өскеменде ондай 786 жағдайы тіркелді, қаланың Лев Толстой көшесі, 18, Шәкәрім даңғылы, 79, Қ.Қайсенов көшесі,30, М.Тынышпаев көшесі, 126, Рабочая көшесі, 6, Сәтбаев даңғылы, 12 аудандарында неғұрлым ластанған.

Қарағандыда 187 жағдай тіркелді, қаланың ауасы №5 бекет (Мұқанов көшесі, 57/3 үй) ауданында неғұрлым ластанған.

Қызылорда және Петропавл қалаларда бір де бір ШЖШ-дан ластаушы заттардың нормадан асып кету жағдайлары тіркелмеді.

Қалған қалаларда ластаушы заттардың жекелеген түрлері бойынша ШРШ-дан елеусіз мөлшерде асқан.