Депутат: "Мен айыппұл төледім, ал сіз ше?"

Семейде маска тақпай суретке түскені үшін қалалық мәслихат депутаттарына айыппұл салынды. Бұл туралы Bugin.kz платформасы Arnapress.kz-ке сілтеме жасап хабарлайды.

Берік Тілебалдиннің айтуынша, айыппұл суреттегі барлық адамға салынған.

"Санитарлық талаптарды бұзған жеке тұлға ретінде әркім айыппұл төлеуі керек. Айыппұл сомасы - 30 АЕК, бұл шамамен 85 000 теңге", - деді қаланың бас санитар дәрігері.

Берік Тілебалдин айыппұл төлеуге бір ай берілетінін түсіндірді. Алайда, егер жеті күн ішінде төлесе, айыппұл сомасының жартысын үнемдеуге болады.

Әлеуметтік желіде кейбір депутат суреттің салдары туралы жазып жатыр.

"Маска жоқ сурет үшін айыппұл төлеу түбіртегін алғаннан кейін алдағы дүйсенбіде бірден төлеймін", - деп жазды депутат Арман Машимов.

Ал "Ауыл" партиясынан сайланған мәслихат депутаты Қайрат Смағұлов айыппұлды төлеп қойыпты. Бұл туралы ол өзінің Facebook желісіндегі парақшасында хабарлады. Тек депутат постқа Нұр-Сұлтандағы Парламент Мәжілісінің жалпы отырысында түскен суретін жүктепті.

Ұжымдық фотода Мемлекет басшысы мен депутаттық фракциялардың басшылары бар. Жалпы жүзге жуық адам. Бәрі маскасыз және әлеуметтік қашықтықты сақтамаған.

"Мен айыппұл төледім, ал сіз ше?" - деп жазды Семей депутаты.