Шетелге керек қазақтың дәмі: Рахман Омар құрт шығаруды қолға алды

Тележүргізуші, кино және театр актері Рахман Омар өзінің жеке брендін – құрт өнімін шығаруды қолға алды. Оны шетелге алып шығуға не шетелден келген қонақтарға ұсынуға болатындай етіп ерекше базарлық түрінде шығарған екен.

Актердің айтуынша, қазақ ауылының дәмін бойға сіңірген бір бренд бар. Ол – құрт.

"Ашаршылық, зұлмат жылдарында халыққа талғажау болған тағамның қадірін жете түсініп жүрміз бе? Бүгінде нарықта құрттың түр-түрі бар. Талғамға, дәміне қарап таңдай бер. Бірақ нағыз табиғи дәмі бар құртты аңсайсыз ба?

  Өз басым шетелге "мынау қазақтың дәмі" деп құрт апарғым келеді", - дейді Рахман Омар.

Осы ойдың жетегінде жүріп табиғи таза, ешбір қоспасыз, сертификатталған, патенттелген әрі формасы ересектерді де, балаларды да қызықтыратын жаңа құрт түрін өндіріске шығарған.

"Сонымен қатар, шетелге шыққанда қазақ халқының атынан базарлық ретінде ұсынатын құрт түрін шығардық. Мұнда хәкім Абайдың адамзатқа қатысты айтқан қара сөзі, құрттың қазақ тарихындағы маңызы да жазылған. Шетелдік достарыңыз, әріптес, серіктестер қазақтың дәмін татып, тарихымен осылайша таныса алады.

Ұлттық өнімді қайта жаңғыртып, ұлттық брендті насихаттау – әрбіріміздің қолымызда. Құрт – біздің асыл тасымыз. Ұлттық өнім шетелдік өнімнен кем түспейтінін дәлелдейік! – дейді тележүргізуші.