Ресейде 12 телеарна өзбек тілінде хабар таратуға рұқсат алды

Ресейдің SPB TV компаниясы Өзбекстанның Ұлттық телерадиокомпаниясымен келісімге келіп, Ресей аумағында 12 өзбек арнасының хабар таратуға рұқсат берді. Бұл жайлы ТАСС агенттігі хабарлады.

Дистрибуция алған 12 телеарнаның барлығы – Өзбекстанның ұлттық телеарналары: жаңалықтар, спорт пен ойын-сауық арналары.

"Келісімшарттың арқасында Өзбекстан телеарналары Ресей мен ТМД аймағында алғаш рет өзбек тілінде хабар таратуға мүмкіндік алды. Өзбек тілінде ақпарат тарайтын аудиторияның көлемі, кем дегенде, 2,5 млн адам", - делінген SPB TV-нің баспасөз хабарламасында.

Өзбек арналары наурыз айынан бастап хабар таратуды бастамақ.

Ресейде қазірде 2 млн өзбек азаматы тұрып жатыр. Телекомпанияның мақсаты – осы азаматтарға ана тілінде ақпарат алуына көмектесу.

"Өзбек тіліндегі контентті ұсыну арқылы жарнама тартып, монетизация жасау ойымызда бар", - деп түсіндіреді SPB TV компаниясының бас директоры Кирилл Филиппов.