Бір аптада 3 371 қылмыстық оқиға тіркелді

Бір апта ішінде елімізде 3 371 қылмыс жасалды. Бүгін, 9.03.2021 ҚР Ішкі істер министрлігінің ресми өкілі Нұрділдә Ораз мәлім етті. Бұл туралы Bugin.kz платформасы inform.kz-ке сілтеме жасап хабарлайды.

“Бір апта ішінде 3 371 қылмыс жасалды. Оның 2 145-і тәулік ішінде ашылды”, - деді Нұрділдә Ораз.

Ресми өкілдің айтуынша, полиция қызметкерлері ізін суытпай 10 кісі өлтіру қылмысын ашқан.

“Сондай-ақ, 10 өлімге әкеп соққан денсаулыққа қасақана ауыр зиян келтіруді, 5 қарақшылық, 39 тонау және 489 бөтен мүлікті ұрлау қылмыстарын ашты”, - деді ол.

Нұрділдә Ораз Халықаралық әйелдер күні қарсаңында Ішкі істер министрі Ерлан Тұрғымбаев ерекше көзге түскен әйел қызметкерлерді арнайы құттықтағанын да атап өтті.

“Айта кету керек, қыз-келіншектер Ішкі істер органдарының барлық бөлімшесінде, соның ішінде қылмыстық полиция, тергеу, қоғамдық қауіпсіздік сияқты жетекші бөлімдерде қызмет атқарады. Бүгінгі таңда полиция қатарында 11 мыңға жуық әйел қызмет етеді, олардың 580-і басшылық қызметте”, - деді ресми өкіл.