Қазақтың танымал онкологы көз жұмды

Қазақстан медицинасы мен онкология саласы алып тұлғасынан айырылып, үлкен қайғыда қалды. Танымал дәрігер, Қазақ ұлттық онкология институтының профессоры Райымқұл Қарақұлов өмірден озды.

Бұл жайлы онкология институты Facebook-тегі парақшасында хабарлады.

"Бүгін түнде біздің құрметті профессорымыз, ұстазымыз, Қазақ ұлттық онкология мен радиология институтының онколог дәрігері Райымқұл (Роман) Қарақұсұлы өмірден озды", - деп жазды олар.

Профессор 1942 жылы Оңтүстік Қазақстан облысында дүниеге келген. Онкология институтына 1971 жылы қызметке келген, докторлық жұмысын Мәскеуде қорғаған.

"КСРО өнертапқышы", "КСРО денсаулық сақтау үздігі" төсбелгілерімен марапатталған.

Қарақұлов шетелдік онкологтармен тығыз байланыста, халықаралық форум мен конгрестен қалмайтын адам болған.

350-ден аса еңбек жазған, оның 50-і шетелде жарық көрген. 10 авторлық куәліктің иесі, оның екеуі – халықаралық деңгейде.