Вакцина жасқа қарамайды: 90 жастағы қария екпе салдырды

Шымкент қаласының 90 жастағы тұрғыны Қуаныш Әбдірахманов  өз еркімен жергілікті тіркелген емханасына келіп, ковидке қарсы вакцина салдырды. Бұл туралы Bugin.kz платформасы хабарлайды.

Бір ғасырға жуық өмір сүрген қария – Шымкент қаласының құрметті азаматы. Әлемдегі жағдайдан күнделікті хабардар болып отырған қарт кісі вакцина қабылдауды жөн көрген. Екпе салмас бұрын қарияны дәрігерлер тексеруден өткізген. Қарсы көрсетілімдер болмағандықтан, «Спутник-V» вакцинасының І-компонентін салып берді. 

– Ойлана келе өз еркіммен вакцина вакцина салдыруға шешім қабылдадым. Біз вирусты осылай жеңеміз. Көпшілікке вакцинадан қорқудың қажеті жоқ екенін айтқым келеді, –  дейді қария.

Айта кетейік, Қуаныш Әбдірахмановтың отбасы мүшелерінің барлығы ковидке қарсы екпе алған. 23-сәуір күні екпенің бірінші компонентін салдырған қария арада 21 күннен кейін вакцинаның екінші компонентін қабылдауы қажет.