Қос тілсіз жаудың зардабы: Түркияда өрттен кейін су тасқыны басталды

Бұл туралы Bugin.kz платформасы хабарлайды.

Қатты жауын-шашыннан болған су тасқыны Түркияның Қара теңіз жағалауындағы көпірді қиратып, бірнеше елді мекенді жарықсыз қалдырды.

Су тасқыны Синоп, Бартын, Қарабюк және Кастамону провинцияларына әсер етті. Түркияның солтүстігіндегі Бартын провинциясында көпір құлады. Төтенше жағдай салдарынан 13 адам зардап шегіп, бір адам инфаркттан қайтыс болды. Сонымен қатар, құтқару қызметкерлері жоғалған 80 жастағы әйелді іздестіріп жатыр.

Премьер‐министр жанындағы төтенше жағдайлар және апаттар басқармасы (AFAD) мәліметі бойынша , 12 ауылда электр қуаты үзілген. Сондай-ақ, ғимараттардың бірінші қабаттары су астында қалған.

Еске салайық, шілденің соңынан бастап Түркияда орман өрттері өршіп тұр. Танымал курорттар 13 провинциядағы орман өрті салдарынан туристік маусымның ортасында от пен түтінге оранды. Кейбір жерлерде жалын тұрғын үйлер мен қонақ үйлерге жақындады, туристер мен жергілікті тұрғындар эвакуацияланды. Кейін террористік ұйым Түркиядағы өрт үшін жауапкершілікті өз мойнына алды.