Балалар арасында жоспарлы екпенің маңыздылығы түсіндірілді

Шымкентте денсаулық сақтау ұйымдарында медицина қызметкерлері балаларға Манту сынамасы, БЦЖ (туберкулезге қарсы) және 16 жастағы жасөспірімдер арасында АДС-М (дифтерия, сіреспеге қарсы) екпе жүргізу бойынша түсіндіру жұмысын жүргізуде. 

Бұл туралы Bugin.kz платформасы хабарлайды. 

Шымкент қалалық №6 емхананың дәрігерлері мектеп медбикелері және ата-аналармен жоспарлы екпе қабылдау бойынша кездесулер өткізді. 

— Балалар және жасөспірімдер арасында жоспарлы екпені қабылдаудың маңыздылығы бойынша емханаға қарасты жеті  мектептің мейіргерлерімен  басқосу ұйымдастырдық. Сондай-ақ  №136, 137 жалпы білім беретін мектептерде ата-аналармен кездесіп, балаларға салынатын екпенің қажеттілінін түсіндірдік. 100-ге жуық ата-ана қатысты. Балаларға егілетін екпеге қарсы болып келген ата-аналар түсіндіру жұмысынан кейін өз келісімдерін берді,- дейді емхананың бөлім меңгерушісі Лаззат Құрбанова. 

Айта кетейік, түсіндіру жұмысы емханаға қарасты №87,56,52,51,77 мектептерде санитарлық талаптарға байланысты ZUM платформасы арқылы онлайн өтті.