Коронавирустан 34 полиция қызметкері қайтыс болды

Елімізде кісі өлтіру, денсаулыққа ауыр зиян келтіру, тонау, ұрлық, бұзақылық, зорлау фактілері азайды. Бұл туралы Мәжілістегі үкімет сағатында Ішкі істер министрі Ерлан Тұрғымбаев мәлімдеді, деп хабарлайды Oinet.kz.

- Көшеде, қоғамдық орындарда жасалатын, бұрын сотталғандар, кәмелетке толмағандар, мас адамдар сондай-ақ қару қолдану арқылы жасалатын қылмыс көрсеткіші төмендеді. Қылмыстың ашылуы жақсарды. Мұндай жағдай 3 жыл бойы сақталып келеді, – деді министр. 

Ерлан Тұрғымбаев пандемия кезінде күніне 12 мың полиция қызметкері уақытпен санаспай жұмыс істегенін, карантин жарияланғанда 50 мың полиция қызметкері міндетін мінсіз атқарғанын айтты. 

- Олар қоғамдық қауіпсіздікті қамтамасыз етті. 445 блок-постты күзетті. Ауру тараған 700 аймақты қоршауға алды. Мейрамханалар мен ойын-сауық ошақтарының жұмысын бақылады. Өкінішке қарай коронавирустан 34 полиция қызметкері қайтыс болды. 19 612 қызметкер аурудан жазылып шықты, – деді министр.