Педофил 6 жасар қыз туралы: «Ересек қыз сияқты елестеді» (видео)

Оралда алты жасар қыз баланы зорлағаны үшін сотталған ер адам жантүршігерлік қылмыстың қалай болғанын айтып берді. Бұл туралы Bugin.kz порталы Астана телеарнасына сілтеме жасап хабарлайды.

Телеарна мәліметінше, қыз балаға зорлық көрсеткен ер адам 50 жаста. Ол отбасылы, үш баланың әкесі. Сот шешімімен ер адам 18 жылға бас бостандығынан айырылған. Сотталушының сөзінше, мұндай қылмысқа баруына ішімдік ішуі себеп болған. Мас болған ол не істеп, не қойғанын білмейтінін айтады. Дегенмен, сот үкімінде зорлықтың бірнеше мәрте жасалғаны көрсетілген.

- "Сол күні досыммен көп ішімдік іштік. Біздің жанымызда алты жасар қыз жүрді. Не болғаны толық есімде жоқ. Ол маған ересек қыз сияқты елестеді. Әрине, мен істеген ісім үшін өкінемін. Мұның бәрі қарғыс атқыр арақтың кесірі. Менің отбасым менің осындай жасағаныма әлі де сене алар емес", - деді сотталушы.

Осы ретте құқық қорғаушылар ата-аналарға балаларын мұндай қылмыстан қорғау үшін перзентіне көбірек көңіл бөлуге кеңес береді. Өткен жылдан бері педофилдердің жазасы қатаңдатылғанын айта кеткен жөн.

Яғни, сотталушыларға мерзімінен бұрын бостандыққа шығу, рақымшылыққа іліну құқықтары берілмейді.

- "Бізде кәмелет жасына толмағандарға қарсы жыныстық қылмыс жасағаны үшін 111 адам қамауда отыр. Оның 99-ы сотталған, 12 адам тергеу изоляторында. Олардың үкімі заңды күшіне енген жоқ. Олардың біреуіне химиялық кастрация тағайындалған", - деді БҚО бойынша ҚАЖД аға инспекторы Әсел Бекбаева.

Биыл елімізде 50 педофил түрмеден шыққан. Сондай-ақ колонияларда екі мыңға жуық сотталушы жазасын өтеуде.