Ақтаулықтар 19 жастағы курсант Мейірхан Бітіммен қоштасты

Алматыдағы ереуіл кезінде қаза тапқан ҰҚК Шекара академиясының курсанты Мейірхан Бітімнің денесі Ақтауға жеткізілді. Оны жер қойнына бүгін тапсырады. Бұл туралы Bugin.kz порталы inbusiness.kz сайтына сілтеме жасап хабарлайды. 

- "Еліміздің болашақ қорғаушысы Мейірхан Ержанұлы өз өмірін Отанына арнады. Ол террористердің қолынан қаза тапты, ол небәрі 19 жаста еді. Бұл қайғылы хабар бәрімізді таңғалдырған жайт. Батыр мәңгілік есімізде. Ата-аналары мен жақындарына шыдамдылық берсін", - деді өңір әкімі Нұрлан Ноғаев.

ҚР ҰҚК академиясының курсанты Мейірхан Бітім Ақтаудағы Ақтаудағы 11-мамандандырылған физика-математика гимназиясын екі жыл бұрын бітірген. Одан кейін Ұлттық қауіпсіздік комитеті академиясы шекарашылар бөліміне түскен. Биыл 2 курста оқып жүрген болатын. Оның мәйіті салынған мырыш табыт кеше Ақтау қаласына арнайы бортпен әкелінген. 

Ел президенті Қасым-Жомарт Тоқаев әскери және қызметтік борышын атқару үстінде көрсеткен батылдығы мен жанқиярлығы, сондай-ақ мемлекет мүддесін қорғау кезінде жасаған ерлігі үшін еліміздің бірқатар азаматтарын мемлекеттік наградаларымен наградтау туралы қаулысына сәйкес, Мейірхан Бітім ІІІ дәрежелі "Айбын" орденімен наградталды.